Fampitam-baovao
CARLTON - 20 novambra 2015
Nankalaza tamin’ny fomba ofisialy ny Andro Afrikanina ho Fampiroboroboana ny Indostria, toy ny firenena Afrikanina rehetra i Madagasikara ny 20 novambra 2015,. Ny loha-hevitry ny fankalazana dia « Ny fampiroboroboana ny Orin’asa Madinika sy Salantsalany hiandiana amin’ny fahantrana sy hamoronana asa ho an’ny Vehivavy sy ny tanora ». Ny lanonana dia teo ambany fiahian’ny Filoha-pirenena sy ny Mpiraiministra, lehiben’ny Governemanta. Tonga nitarika ny lanonana ny Minisi-panjakana miadidy ny Fandaharan’asan’ny Prezidansa sy ny Fanajariana ny Tany, Andriamatoa Rivo RAKOTOVAO. Nampitsiahiviny tamin’ny lahateniny fa isan’ny ezakin’ny fitondram-panjakana ankehitriny ny hanohanana Indostria matanjaka, ary efa voafaritra ao amin’ny teboka faha-3 ny drafitra nasionalin’ny fampandrosoana na ny PND 2015-2019, ary isan’ny laharam-pahamehan’ny governemanta ny fanohanana ny vehivavy sy ny tanora.
Fanoitry ny fampandrosoana maharitra ny Indostria tohanan’ny fampiofanana sy fanabeazana ny vehivavy sy ny tanora
Ny solotenan’ny Sampandraharahan’ny Firenena mikambana misahana ny fampiroboroboana ny Indostria na ny ONUDI eto Madagasikara, Ramatoa Lorence ANSERMET no nitondra ny tenin’ny Sekretera Jeneralin’ny Firenena mikambana, Andriamatoa Ban Ki-moon sy ny Tale Jeneralin’ny ONUDI eran-tany, Andriamatoa Li Yong , izay samy nanitrikitrika fa mba ho fampiroboroboana ny indostria, dia tokony hanohana ny sehatra tsy miankina mirona amin’ny fiharian-karena mahomby sy ny fampiofanana sy fanabeazana ny vehivavy sy ny ankizy i Afrika. Ny solotenan’ny Fandaharan’asa alemana Friedrich Ebert Stiftung na FES eto Madagasikara kosa dia nampahatsiahy fa faniotry ny fampandrsosoana maharitra ny Indostria ary manohana ny ezak’I Madagasikara mba hananany sehatra indostria matanjaka, mavitrika ary mpanome asa mendrika ny FES.
Ny sehatra tsy miankina nanome voninahitra
Tonga nanome voninahitra ny tompon’andraikitra rehetra ny sampandraharaha ara-panjakana voakasika mivantana na ankolaka tamin’ny fampiroboroboana ny Indostria, indrindra koa ny avy amin’ny sehatra tsy miakina, isan’izany ny avy amin’ny Sindikan’ny Indostria Malagasy (SIM), ny Fivondronan’ireo Orin’asa afakaba (GEFP), ny Fivondronan’ireo Orin’asa Eto Madagasikara (GEM), ny Fivondronan’ny Mpandraharaha Malagasy (FIVMPAMA), ny Fivondronan’ireo Mpandraharaha vehivavy ato amin’ny ranomasim-be Indiana (EFOI), sy ireo solotenan’ny fikambanana miara-miasa amin’ny tanora sy ny vehivavy.
Hivoaka tsy ho ela ny ny lalana vaovao mikasika ny fampiroboroboana ny indostria
Nampahafantarina ampahibemaso sy niadian-kevitra nandritra io andro io ihany koa ny «drafitra voalohany ny volavolan-dalana mikasika ny fampiroboroboana ny indostria», izay mifandraika amin’ny fanatanterahana ny politikan’ny fampiroboroboana ny Indostria efa notapahin’ny rehetra ny taona 2014.
Mila fanamafisana ny tontolo fampiroboroboana ny Fandraharahana
Niadian-kevitra ihany koa ny tokony hanamafisana ny tontolo fampiroboroboana ny fandraharahana ho an’ny vehivavy sy ny tanora. Isan’ny nampahafantarina nandritra ny fankalazana ny ezaka efa atao:
i) toa ny fampidirana ny fitaizana amin’ny toetsaina fandraharahana amin’ny fanabezana any antsekoly ho an’ny ankizy malagasy,
ii) ny fifaninanana karakarain’ny Total Madagascar ho an’ny tanora malagasy ho sahy hanorina orin’asa « STARTUPPER de l’ANNEE »
iii) ary ny tetik’asa fametrahana « Tranon’ny fandraharahana » hotanerahin’ny Minisiteran’ny Indostria sy ny Fampiroboroboana ny Sehatra tsy miankina. Niara-niombon’antoka tamin’ny Minisiteran’ny Indostria tamin’ny fankalazana ny ONUDI sy ny FES na ny « Friedrich Ebert Stiftung».
