Madagate.com le premier portail d'information et d'analyse politique de Madagascar

Alain Mahavimbina, Lehiben'ny Faritra Atsinanana

Tany aho, nahita aho, nandresy aho ! Io no teny navoitry ny Lehibe ny Faritra Atsinanana, Alain Mahavimbina, raha nitatitra ny zava-bitan’ny Tetezamita ao Toamasina ny Filoha Andry Rajoelina.

Maro ny zava-sarotra nolalovana vao tonga tamin’ny fahavitan’ny tetik’asa telo be izao dia : ny trano vaovao miisa 100 lasa “Cité FITIAVANA”; ny Hopitaly manara-penitra ary ny Lapan’ny Tanàna.

Ny lahaten’ny Lehiben’ny Faritra dia nitatitra fa nisy tokoa ny sakatsakana tao anatin’ny fanatanterahana ny asa. Noho ny fikirizana sy ny tsy fihemorana anefa dia tontosa soa aman-tsara ny asa rehetra, ary dia iny notokanana tamin’ny Asabotsy 19 sy Alahady 20 Janoary 2013 lasa teo ireo tetik’asa telo goavana ireo.

Sakatsakana izay namafisin’ny Filohan'nyTetezamita, fa "nisy mihitsy ny nanakarama olona hitokona sy handrava ny fefy, teo anoloan’ny fanamboarana ny tetik’asa iray. Ny tsirairay no mitsara izao na tsara na tsy tsara ny nanaovana ny “Hôtel de ville”, hoy ny Filoha Andry Rajoelina.

Nisantarana ny fitokanana rahateo ny fahavitan’ny Trano Mora izay nomena anarana hoe: “Cité FITIAVANA”, ary natokana ho an’ireo tanora latsakin’ny 35 taona izay efa ao anatin’ny famelomana ny vady aman-janany, na ihany koa efa eo ampiandrasana ny menakin’ny ainy.

Ny lahateny nataon’ny Emperora Jules Cesar, fony izy tany Frantsa, no nentin’ny Lehiben’ny Faritra namintinana ny làlana nodiavina dia ny hoe : Tany aho, Nahita aho, Nandresy aho, (Veni, Vidi, Vici - Je suis venu, j'ai vu, j'ai vaincu) ka tonga tamin’ireny fitokanana ny zava-bita ireny.

“Tany ianao Andriamatoa Filoha, nijery akaiky ny tena ilain’ny mponina sy ny tokony mahasoa azy, ary dia nahita ny zava-misy sy ny manahirana ny mponina. Niafara tamin’ny fandresena izany. Izay no porofo ny fahavitan’ireo hetahetan’ny mponina izay vao notokanana tsy ela ireo”.

Raha ny trano vao notokanana dia hita manaraka ny fenitra rehetra eo amin’ny fanamboarana. Trano miisa 100 izy ireo ka misy karazany roa, dia ao aloha ny trano nolokoina fotsy, ary ao miloko volon-tany mena. Ireo voalohany, izay miisa 28 dia nahatratra hatrany amin’ny 90 tapitrisa Ariary ny vidiny, ka fianakaviana manana ny fidiram-bola ambony kokoa no afaka miditra aminy.

Ny faharoa kosa dia 24 tapitrisa Ariary. Ny fanomezana ny trano kosa dia natao tamin’ny alàlan’ny hatsapaka, izay nahitana mpivady tanora miisa 250, ka ny 99 tamin’izy ireo no nahazo ny trano.

Ny trano iray moa dia natao hipetrahan’ny mpiasa izay misolon-tena ny Minisiteran’ny fampandrosoana sy ny Fananjariana ny tany ao an-toerana. Marihina fa miaraka amin’ny kara-tany ny fanolorana ireo trano .

Na eo aza anefa ireo sisa tsy mbola nahazo dia naneho ny faniriany ny Praiminisitra lefitra misahana ny Fampandrosoana sy ny Fanajariana ny tany, fa tokony ho hisy ny manaraka ho azy ireo. Ny fanamboarana ny trano rahateo, izay natokana ho an’ireo tanora 35 taona, dia natao ho hanomanana ny ho avin’ny Firenena.

Ny Filohan’ny Tetezamita dia nitatitra fa :

“Tafa-vory eto isika androany araka ny fotoana sy ny fampanantenana izay napetraka, satria nametraka isika fanamby ny hoe: mila manorina ho avy tsaratsara kokoa, mila manorina trano ho an’ny tanora. Dia miara-mahita isika androany. Vita ve izany fanorenana izany, sa tsy vita tompokolahy sy tompokovavy?

Midika izany fa ny ho avy tsaratsara kokoa no miandry antsika rehetra, araka ny teneniko teny amin’ny seranam-piaramanidina teo dia hoe : henoko sy tsapako ny alahelonareo satria maro ianareo no nitomany, maro ianareo no nalahelo, kanefa hoy izaho hoe : isika dia tsy hifanary, araka ilay hira hoe “ HIARAK’ISIKA, NA TOMANY NA SARIAKA, HIARA-HIZAKA NY MAFY EFA VONO-KIAFY, RAHA SENDRA MANDALO ‘LAY RIVO-PANDRAVA DIA HIARAK’IKALO FA IO MBOLA HISAVA” .

Misy mantsy, Tompokolahy sy Tompokovavy, ny mieritreritra fa hoe rehefa vakiana ny mari-pakàna ny hafanana dia izay. Tsia satria vao maika miakatra ny hafanana, Tompokolahy sy Tompokovavy, dia ny hafanana ny fitiavan-tanindrazana, ny hafanana ny hanavotra ity firenena ity, ka tsy hisy hahasakana antsika hikarakaraka ny tanora, hikarakara ny Malagasy, dia HIKARAKARA ANAO NAMAKO TANORA, HIKARAKARA ANAREO REHETRA VAHOAKA MALAGASY NAMAKO. Ka ny teniko dia tsotra: aza malahelo ianareo satria ny ho avy dia eo aloha, tsy ho any aoriana mandrakizay. Manàna finoana fa eo anilanareo mandrakariva ny tenako, hanasoa sy hampandroso an’ity Madagasikara ity.

Izany finoana izany no mampiavaka antsika amin’ny mpanao politika tia fahefana, ny mpanao politika tia tena, fa tsy manana fitiavan-tanindrazana. Izay no mampiavaka antsika, ka izany no tohizantsika hatramin’ny farany.

Ho anareo miara-dia, ho anareo mitovy fomba fijery, henoy ny teniko, jereo ny masoko fa ho hitanareo ny dià, ho hitanareo ny lalàn-kaleha. Ka ny hatongavantsika eto androany dia ho anareo tanora. Iza tokoa moa ny tanora no tsy maniry mba hànana izany ankohonana, hànana izany trano fonenana ho azy izany ? Tanteraka ary ho tanteraka ny nofinofin’ireo tanora androany ! Tsy hiteny isika hoe: iza no nanatanteraka izany, fa tsotra ny teniko : ny “cité” voalohany teto Toamasina dia tamin’ny androan’ny Repoblika voalohany, tamin’ny andron’i TSIRANANA, dia ny “cité Beryl rose” izany. Fa ankehitriny tonga ny mpitondra ny Tetezamita ka na tao anaty ny fotoan-tsarotra aza, dia vita ny “CITE FITIAVANA”.

Tsy napetrapetraka foana izany“CITE FITIAVANA” izany fa dia nomena am-pitiavana, ary natao am-pitiavana ho anareo tanora malagasy, ho anareo tanora eto Toamasina, Tompokolahy sy Tompokovavy”.

Taorinan’ny fanambarana natao ny Filoha ny Tetezamita ny amin’ny tsy hirotsahany ho fidina amin’ity taona ity sy ny mety manitikitika ny sain’ny rehetra, dia nilaza ny Filoha Andry Rajoelina, fa “tonga eto ny tenako hanazava izay fanontaniana manitikitika ny sain’ny rehetra, mba tsy ho alahelo fa hino ny ho avy, satria mahatoky ny ho avy isika.

FENO HAFALIANA TAMIN’NY TSY AMPOIZINA IREO RENIM-PIANAKAVIANA, RAHA NOTONONIN’NY FILOHA NY TETEZAMITA NY ANARANY, FA AZY NY TRANO MORA.

Ny Filoha Andry Rajoelina manolotra ny lakilen'ny trano n°2 an'i Rtoa Domine Elisaberthe

Hafaliana tsy omby tratra no hita teo amin’ny hendrik’ireo tanora, naheno ny anarany izay notonin’ny Filoha ny Tetezamita ny folo tamin’izy ireo, raha somary nangitakitaka teo am-piandrasana ny ankitsapaka.

Noho ny hamaroan’ny isa natao ankitsapaka mantsy, izay nahatratra 99, dia voatery natao folo ihany no ankitsapaka teny amin’ny lampihazo, ary notohizana teny amin’ny Lapan’ny Tanàna vaovao ny ambiny.

Zava-dehibe tokoa ho an’ny tanora ny fahazahoana ny trano toy izao, satria raha jerena dia mbola vitsy -indrindra ireo tanora- no afaka manana trano ho azy manokana, fa saika manofa avokoa izy ireny. Tsy vitany manofa ihany fa eo koa ny fahalafosan’ny hofa-trano, izay mahatratra 100.000 Ariary farafaha-keliny ny hofany. Ny eo am-pelatànana anefa zara raha ampy ny iray volana ho an’ny fandaniana, ka tamin’ity indray mitoraka ity dia afaka mandoha izany tsikelikely izy ireo.

Nandika an-tsoratra: Andry Rakotonirainy sy Jeannot Ramambazafy

Sary: Harilala Randrianarison

===================================================

IREO NAHAZO TRANO MORA NATAO ATSAPAKA IMASOM-BAHOAKA TAO TOAMASINA