Tonga omaly 31 marsa 2021 ny ora sy andro nandaozany ity tany fandalovana ity fa ho tavela ao am-pon’ny Malagasy maro an’isa sy ny taranany ny asa navelany tety.
Na tiana na tsia dia taitra ihany isika rehetra rehefa nahare ny fahalasan’i Ndriana Ramamonjy. Marina fa nandeha ny feo fa tsy salama izy. Fa niafara tamin’ny fodiany mandry izany.
Zandriko 3 taona izy satria raha 6 aogositra 1954 aho no teraka, izy kosa dia ny 13 janoary 1957 no tonga tety an-tany. Ary nandritra ny fivahiniany dia olona tsotra sy tsy be sehoseho mihitsy izy.
Ny mahavariana dia ity : tsy dia nifampiresaka firy mihitsy izahay mirahalahy fa isaky ny misy tranga lehibe eto amin’ny firenena, na fifaliana io na fahoriana, indrindra indrindra, dia teo foana izy ary anisan’ny mpanentana sy mpitendry clavier hatrany.
Nanomboka ny taona 1990 tany no fantatra ny anarany satria izy dia mpamorona hira ara-pilantsara (“chansons évangéliques”). Ka ny hirany dia ry Fara Andriamamonjy sy Hantatiana no namelona azy tamboalohany.
Taty aoriana dia natsangany ny hoe “Tarika Ndriana Ramamonjy” ary efa enina (6) be izao ny raki-kira novokariny. Midika izany fa maro dia maro ny sangan’asany hirain’ny mpivavaka kristianina hatreny am-piangonana ary maro koa anefa no tsy mahalala fa izy Ndriana Ramamonjy no namorona ny tonony sy ny feon’izy ireny.
Io manaraka io ary misy hafatra avy any aminy izay hitoetra mandrakizay, ary izy handry am-piadanana mandrapihavian’ny Tompo, araka ny finoana kristianina.
Amin’ny anaran’ny mpiara-miasa ao aminy madagate dia maneho etoana ny fiaraha-miory amin’ny fianakavian’i Ndriana Ramamonjy tsy ankanavaka, ny tenako.
Nahoana tokoa, lahy, raha tena mifankatia ny samy Malagasy ?
Jeannot Ramambazafy
........................
MIFANKATIAVA
Tamin'ny fo no tena ninoanay
Fa Jesosy no tonga hamonjy anay
Tamin'ny vava no tena nanekenay
Fa ny ràny no nanadio anay
Vavaky ny Tompo (mampiray)
Fanahy izay nomeny (mampiray)
Fanahy, Fitiavana koa ny Ray
Nahoana lahy raha Mifankatia
“Mifankatiava hoy ny Tompo,
f'izany no hamantaran'ny olona rehetra,
Fa Mpianatro ianareo"
Tsy iray finoana, f'iray ao Aminao
Tsy iray fihaviana,f'iray an-dapanao
Tsy iray fiteny, fa samy henoinao
Tsy iray fihodirana,fa samy zanakao.
Vavaky ny Tompo...
Ndriana RAMAMONJY