FANAMBARANA AVY AMIN'NY FFKM -
Fiombonan'ny Fiangonana Kristianina eto Madagasikara
Mikasika ny toe-draharaham-pirenena
Ry vahoaka Malagasy, ry Kristianina havana,
Ho aminareo anie ny fahasoavana ombam-piadanana avy amin’Andriamanitra Ray sy Jesoa Kristy Tompo ary ny fiombonana amin’ny Fanahy Masina.
Eo anatrehan’ny zava-mitranga eto amin’ny firenena, ny FFKM dia manao izao fanambarana manaraka izao:
1- Miombona fahoriana amin’ireo fianakaviana namoy havan-tiana, ireo naratra; ireo rava fananana rehetra, very asa sy fihariana noho ny fandrobà na sy ny fandoroana amin’ny toerana maro; ao anatin’izany ny Fikambanana Mampiely Baiboly Malagasy.
2- Misaotra ireo mpamonjy aina; ireo mpiasan’ny fahasalamana mitsabo ireo maratra; ary koa ireo rehetra mikendry mandrakariva ny hisian’ny fitoniana sy ny filaminana. Isaorana ihany koa ireo mpiasan’ny haino, vaky, jery miezaka mampita sy mampahalala ny zava-misy amin’ny mpiara-belona.
3- Antso ho an’ny Fiangonana ny miaraka amin’ireo iharan’ny tsy rariny ary ijoroany izany. Mitaona ny rehetra ny FFKM mba hampitsahatra ny fifandatsahan-drà , ny fifandrafiana, ny fanimbana fotodrafitrasa sy ny fandrobana fananan’olona amin’ny endriny maro samihafa ; ny fifampihantsiana amin’ny teny aloaky ny vava sy ny fihetsika atao, ka samy hifanatona, hifamela heloka hirosoana amin’ny fitoniana sy fifampiresahana ho fitadiavam-bahaolana maharitra sy haingana, hitondra amin’ny fihavanana sy ny fandrosoana hisitrahan’ny vahoaka rehetra ny zo fototra tokony ho azy, toy ny jiro, rano, fitoniana, fihariana, filaminana,fandriampahalemana,… « Iza amin’ny raim-pianakaviana angatahan-janany trondro ka tsy hanome azy trondro fa bibilava » Lioka 11,11.
4- Aoka samy hitandro ny fandriam-pahalemana; hahay hifampihaino ao anaty fifanajana ny mpitondra sy ny vahoaka ,ny Ray aman-dReny sy ny tanora ary ao anatin’ny fahatahorana an’Andriamanitra no hanaovana izany.
5- Entanina isika mianakavy hanohy ny fandinihan-tena sy hampitombo ny vavaka, entanina ihany koa ny isam-pianakaviana mba hanandratra vavaka isan’andro ho an’ny firenentsika satria hoy ny Soratra Masina « Ka raha amin’izay no avy hanetry tena ny vahoakako izay iantsoana ny anarako, ka hivavaka sy hitady Ahy ary hiala amin’ny toe-dratsy, dia hihaino avy any an-danitra Aho ka hamela ny fahotany ary hahasitrana ny taniny» 2 Tantara 7:14
6- Ireo izay nandroba, aoka hamerina ireo fananana azo tamin’ny halatra fa tsy mahasoa anareo izany. Aoka isika haneho firaisankina, hikajy mandrakariva ny soa iombonana ary hanana fo antra sy onena tahaka an’i Jesoa, manoloana ny fahoriana sy ny fijaliana mianjady amin’ny hafa.
7- Ny fanekena hiverina amin’Andriamanitra ihany no hany vahaolana tokana ho an’ny firenentsika ao anatin’ny FIEKEN-KELOKA sy FIBEBAHANA izay hitondra any amin’ny FAHAMARINANA sy ny FIHAVANANA(4F) satria ny « Ny fahamarinana manandratra avo ny firenena» Oh 14:34
Ny FFKM , dia mijoro mandrakariva ho Raiamandrenin’ny vahoaka Malagasy tsy ankanavaka; noho izany dia mitandro hatrany ny toetsaina mifampihaino sy mifanaja.
« Izay manan-tsofina, aoka hihaino izay lazain’ny Fanahy Masina amin’ireo Fiangonana» (Ap. 3:6)
Homba antsika mandrakariva anie Jesoa Kristy Tompo.
Natao teto Antananarivo anio Zoma 26 Septambra 2025
Ny Filoham-piangonana efatra mirahalahy
Monseigneur RAOELISON Jean de Dieu
Solontenan’ny EKAR Filohan’ny FFKM
Monseigneur RANARIVELO Samoela Jaona
Filohan'ny EEM
ANDRIAMAMPIANINA Zaka, Mpitandrina
Filohan'ny FJKM
Pastora Dr RAKOTOZAFY Denis
Filohan'ny FLM