Ivato, 14 Oktobra 2017. Tonga tao amin’ny seranam-piaramanidina iraisam-pirenena ny nofo mangatsiaky ny Profesora Zafy Albert, Filoham-pirenena teo aloha (1993-1996) izay nodimandry tatsy amin'ny Nosy La Réunion, ny Zoma 13 Oktobra atoandro.
Tonga nitsena sy nanome voninahitra izany fahatongavana izany ny Praiminisitra, Lehiben’ny Governemanta Mahafaly Solonandrasana Olivier sy ireo mpikambana ao amin’ny Governemanta.
Hita teny an-toerana ihany koa ireo Filohan’ny Andrim-panjakana amin’izao sy teo aloha, ny Filoham-pirenena teo aloha, Didier Ratsiraka mivady, ny sokajin-kerim-politika maro samihafa ary ireo fianakaviana.
Rehefa avy nanaovana ny fomba rehetra fanomezam-boninahitra ny Filoham-pirenena teo aloha rehetra rehefa modimandry dia nihazo avy hatrany ny trano fonenany eny amin’ny Villa «La Franchise», ao Ivandry, ny nofo mangatsiakan’ny Filoham-pirenena teo aloha Zafy Albert sy ireo rehetra nitsena azy teny Ivato.
*************
Toa izao ny fandaharam-potoana izay nomen’ny fianakaviany:
- Alin’ny 14 oktobra 2017: nandrasana tao amin’ny trano fonenany ao amin’ny Villa «La Franchise», Ivandry, ny nofo mangatsiakan’ny Filoham-pirenena teo aloha, ny Profesora Zafy Albert. Ny fiaretan-tory dia natokana ho an'ny fianakaviana ihany.
- Alahady 15 oktobra 2017: fotoam-pivavahana ao amin’ny EKAR Antanimena izay tarihin’ny Mgr Odon Marie Arsène Razanakolona. Aorian’izay dia entina avy hatrany ao amin’ny Lapan’ny Fanatanjahantena sy ny Kolontsaina Mahamasina ny nofo mangatsiakan’ny ny Profesora Zafy Albert, ho vangian’ny Malagasy tsy vaky volo ka hisy ny fiaretan-tory amin'izany.
- Alatsinainy 16 oktobra 2017: fivavahana firaisam-pinoana. Vita ny fotoam-pivavahana dia hizotra mianavaratra ny razana ka hiazo an' Ambilobe amin'ny alalĂ n'ny fiara (fa tsy fiaramanidina) vao handeha any Betsiaka toerana nahaterahany.
- Sabotsy 21 oktobra 2017: andro hanitrihana ny nofo mangatsiakan’ny Profesora Zafy Albert any amin'ny fasan-drazany any an-toerana.
Jeannot Ramambazafy 15 Oktobra 2017